阿！彼工走去台灣个店，予我捎著這本《露杯夜陶》，是波斯（pho-su）詩人Omar Khayyám（台譯做奧瑪凱琰，我臆作者應該是讀做 ”ò-má-khái-iám”）个作品「Rubaiyat」个台語翻譯版。作者是沙卡布拉揚（A.D. Sakabulajo），我臆作者應該是將《露杯夜陶》讀做 ”lō͘-pai-iā-tô”，雖然杯應該是讀pue，但是可能作者受日語个影響，將伊牽來做”bai”个音，除非是我誤解bai个音，按呢標題可能著是照字讀tshuài个”lō͘-pue-iā-tô”。
外包裝寫著「臺語文學鷹揚的先鋒」、「限定三百本」，氣魄有夠好！台灣个店个頭家講，想袂到taⁿ仔排tshuài，著隨hông買去，真歡喜有人對這有興趣，我家己心內是親像揣著寶，想講頭家哪會這馬才排tshuài，閣問伊講按呢是毋是有一寡口面揣無个遮攏有，伊笑笑講攏藏佇內底，連「5%臺譯計畫」攏猶有一寡仔！幹，這箍頭家實在有影孽潲 XDDD
包裝提掉，內面个書真正有夠媠，干焦看封面著有夠心適。
我對西方文學，其實有夠生分，這本我是毋捌聽過，是看著台語文个冊竟然會當做甲遐爾仔媠，才衝磅買lueh个，是講，台灣个店賣六百，幹我去查著露天竟然愛賣千五，幹真正予我趁著。我去查著个資料是講，這原本是波斯數學家參詩人奧瑪凱琰个筆記，佇十九世紀予英國作家費志嘉拉德（這是沙卡布拉揚个翻譯，原名E. Fitzgerald）翻譯做英語了後，才真正衝（tshìng）--khài，沙卡布拉揚个這本嘛是用費志嘉拉德个英譯本做基礎來翻个。
沙卡布拉揚佇頭起先，干焦序著寫20頁去，閣有表列出伊收藏个全世界Rubaiyat个翻譯本，總共三十七種，實在有夠厲害，嘛因為按呢，沙卡布拉揚規氣逐篇攏共七語對照，包括英語、波斯語、台語、法語、德語、義大利亞語、西班牙語七種，排版起來閣有夠媠，大概是我自呂美親个《落雨彼日》以來，收過台語个冊內面排版上媠个，實在有夠心適。
買著這本真正有夠歡喜，不而過，作者用个台語書寫系統佮現此時時行个無啥仝，有一寡字愛看一站仔才看會tshuài，另外，我感覺作者翻譯个台語無夠「台」，毋但（m̄-nā）佇句法頂面無啥合（ha̍h）台語本來个形式，嘛有一寡足明顯是華語專屬个詞，應該有閣較合台灣人phòng時使用，但是閣不失雅氣个表達方法。
譬論講，第六篇个「煞將凋黃玫瑰的面染出血色了」，彼字”了”佇台語應當袂佇這个情境之下下（hē）佇句尾，除非佇作者个書寫體系內底，”了”是表達”ah”，按呢咱當然無話講。猶閣有第十一篇的「遮仔有麵包、美酒含詩卷」，彼个”麵包”著足明顯是華語矣，猶是講第十四篇「有的卜變成灰燼」个「灰燼」，嘛應該會當改做閣較好个表達方式。
不管按怎，這本冊真正足特殊个，若是予仝款厲害个作者，來以華語來寫來出版，閣會當按呢多語對照、媠插圖一堆，這本百面衝甲掠袂牢，但是人沙卡布拉揚不管，堅持用台語寫，既然是用咱个語言，嘛總算是咱台語人个模範佮驕傲。真歡喜收著這本冊！
