吳樂天曲--去--ah。人攏講是時代个結束，我感覺，是咱又閣失去一个純粹个台灣人。
前--斗豬哥亮死，踮佇網路頂是死無人哭，閣蓋濟人歡喜講父權个代表死死--去，毋知是按怎，吳樂天煞無人譬相，伊是共菲律賓人喊（hiàm）做死番仔个角色，是都市人看上無个王祿仔，逐家恬啁啁（tiām-tsiuh-tsiuh），毋知是毋是有人拍過紀錄片，閣佇紀錄片影展放送，遐爾厲害个角色予人毋敢講話。
若講因為吳樂天是插民主政治个偉人，豬哥亮無，前--仔高俊明死，煞uân-nā有个人暢甲。死有真濟方式，老嘛是，我看是吳樂天老來tshun無一箍潲，干焦一塊電影，幾个所在塊放，可能原底著無幾个人會記得，伊个時代早著過--去，毋是這馬才結束。
兩冬前，豬哥亮死，我是真àng-láng，家己一个若痟--个，透早起車騎--咧著一路騎去台中，現此時，吳樂天死，我已經無啥感覺，該悲傷个部分佇紀錄片出--來个時，著已經感慨煞--ah。三、四年前扞（huānn）社團，著有想過講欲請吳樂天來重演1990年代佇台大彼場演講，無偌久「就是這个聲音」出，夭壽，才知影這咧時代偉人已經起痟，無救--ah，我不如繼續去艋舺開查某，看敢會拄著吳樂天本人較實在。
若彼陣正經揣著伊來，有幾个學生仔會來？是毋是著愛閣替怹翻譯才會通？姦恁娘，想想--咧較早睏較有眠。
五、六年前，我猶閣高中，下課坐捷運轉--去，才閣予阮爸載轉--去厝，阮爸攏佇車頂放收音機，拄好10點左右攏咧放吳樂天，欲講彼「是我生活中个一部分」，是傷過頭，但是至少無可能毋知這个傳奇。自都市轉庄跤，這至少是一个印記，逐日十點著知影我又閣轉--來厝，雖然䆀處較濟，自由佇十點了後就消失--去，袂當閣再食薰。
印記著tshan像一粒記，生佇皮膚頂，彼位个肉若phàng見，啥物都無tshun。我想可能是按呢，該走个攏走--去--ah，毋是割肉，是phàng見去，啥物攏無tshun，tshan像老--來个新廖添丁吳樂天，予國民黨拍甲啥物攏無去，到甲欲死煞無半項。
老--个彼緣，大概攏有這lo̍h感覺，拍拚一世人，少年个tshām台語都袂hiáng，欲死若毋是眾人嫌，著是無人數念。像吳樂天彼咧年代，上蓋單純，插政治著是查埔人，講台語著是台灣人，國民黨壓霸，朱高正獨个時陣上好，統个時陣上䆀。單純有單純个䆀，怹到尾仔總算會拄著譬相个一日，但是畢竟是單純，單純个向望毋免hiau-gî，永遠永遠，囝囝孫孫代代，雙手合拜。
著是怹彼代个台灣人，純純粹粹个台灣人，擔起一个時代，佇我心目中永遠攏是一个Utopia，永遠無法度閣看著个Utopia。tshām台語to講袂輾轉个我，有啥物價值好數念？仝款个歷史，發生佇台灣，嘛發生佇我身上佮身軀邊个人，理想恐驚已經phàng見，煞尾啥物攏無。
這幾工，看人咧講毋通教人智識，愛共人「會用得做」、「有能力做」， kap著吳樂天曲--去个時間點，tshan像咧共我剾洗，是按怎前--仔毋做，tsiáng--時朋友逐項攏做--khài--ah，我煞已經跤手軟kô-kô，無心無力？是按怎彼陣遐爾好个時機把握著，無路用个我袂振袂動？我有好處也有䆀處，但是選擇兩項攏共放捒--去，是我个毋著。
家己、人、世間、時間、島嶼，無一項tsang會著，來甲到个無一項掠會牢，親像輪迴--去个先人，在生个毋知欲按怎數念，上蓋艱苦。
