一塊歌若譬論做囡仔，作詞kah作曲to̍h親像阿爸kah阿母。1957年上原げんと作曲个《十代の恋よさようなら》，予葉俊麟thinn詞，改做咱台灣个《可憐戀花再會吧》，1959年出世，予洪一峰唱kah轟動全台灣。
這塊洪一峰个原始版本，比後來tshiâng在聽著个速度，有較緊淡薄，編曲mā較簡單，較uá神戸一郎个原版，是講這塊台灣原版是siáng編曲个，tsín暫時揣袂著。洪一峰个唱法，淡薄仔軟閣淡薄仔粗，無sîng感情全放，若斟酌聽，顛倒較sîng一个講故事个人teh唱講伊tsa̋ng佇湖邊看著一个人按怎拄按怎，唱歌个人親像teh畫一幅圖，hia个悲情kah寂寞，攏是畫內底个線條hām色彩。
若是teh講人个故事，彼个人是siáng？唱歌个人，敢有法度家己浸入去湖邊彼个人个世界？至少會當確定个是，若照頂面彼張圖，佇洪一峰心內，彼个人真有可能是查某--个，自我細漢到tann，印象中正經愛這條歌、phòng時會共當做山歌按呢teh唱个，總是女性占多數，拍算是女性體會這塊歌个感覺較深吧！
這馬歌生--出來ah，大hit-tooh--落去，開始這條歌伊百款个境遇，to̍h是予人編曲、予人翻唱，予濟濟台灣人代代傳lueh，到kah tann61年ah，仝一首歌就按呢千變萬化，各人有各人个故事佇咧歌內底，比無聲个字冊閣較豐富。
陳一郎个版本，親像一个釣魚个人，看邊仔失戀个小姐失神失神，緊唱予伊聽較免伊正經跳海；江蕙親像一个做má个oo-bá-sáng，teh想伊少年hit段戀夢，已經足久足久，到kah強欲無滋無味个久；葉啟田个親像廣播電台，主持人teh讀一个聽眾寄來个批，聽會出感情，不而過有聲無影，閣攏是別人个故事。
Youtube其實是一个真好个參考，今仔日重點是youtube觀看人數第一名（400thóng萬！）个林姍版本：
自八大hia个仙个編个編曲開始，咱親像一聲著落lueh水lìn，風、月、戀花、水鴨，tsia一寡若真若假、早to̍h離都市生活離kah遠遠个物件，全部uá來佇身軀邊，咱就按呢浸佇湖底，萬項攏離咱足近，煞閣啥物攏看袂清楚。
著愛看影片，林姍个面路、表情、姿態，佇當今歌壇內底是一等一，我毋知影是按怎伊个歌攏袂tshìng，總--是，伊佇我心內，總算共湖邊彼个人救活--起來，佇恬靜个暗暝，孤一个想過去、想當今，煞按怎都行袂到未來。
湖邊彼个人，伊个青春夢，正正是歌手、也是咱聽眾个青春夢；彼个人个不得已，正正是湖底个咱，被音樂感動kah無喘氣个時，uì嚨喉雄雄溢--出來个無奈。彼个人佇60年後出來唱歌，總算予咱閣一擺uì台灣人个媠，看著代代流傳个戀花，喝一聲開kah滿天，一時仔精神，原來所有个風景攏毋捌改變。
這to̍h是歌手kah編曲个厲害，這馬《可憐戀花再會吧》到kah一个新的境界，未來猶原予人期待，若準葉俊麟猶佇leh，看家己个囡仔一直大漢，應該真安慰才著。
最近秋天無張持to̍h到，燒熱个感覺親像昨暝teh hām-bîn，西北雨已經無閣落，一時間有去無回，tshun秋夜个天清月明，人煞tiâu佇舊時个心境，夜蟲是毋是猶原teh嘆秋風、哭規暝？
