這是一條無蓋出名 ê 歌，kah 唐飛另外一條上出名 ê《癡情台西港》仝款，攏寫講「石喬」作詞作曲，但是癡情台西港實際上是日本曲，毋知這條敢是。
有一寡資料講「石喬」是號做「呂清源」，作詞作曲，但是毋知影是毋是kā唐飛作詞作曲彼ê「石喬」；1960~80年代，有一个「石橋」，有可能但是無確定敢是仝一个人，嘛毋知影有關係抑無，但是明明出過真濟專輯，連一條歌都揣無。
無論如何揣袂著，按怎查攏捎無摠，更加毋免講「石橋／石喬／唐飛」遮 ê 名是欲按怎用台語呼音。
haih sioh — haih haih haih sioh —
台西夜港邊
台西港佇佗位？佇雲林抑是彰化？唐飛佇hia唱遐濟歌，癡情台西港、重逢台西港、台西夜港邊、相逢台西港……若按呢hia一定真媠，敢按呢？若真媠，哪會無人 teh 講起？
唐飛是 siáng？哪會聲音怪怪？敢是半陰陽仔？若是按呢，佇這馬這个時代，敢毋是應該真濟人討論？
ah，hiooh，頭前這个「haih sioh — haih haih haih sioh — 」，聽起--來毋是唐飛 teh huah ê neh，毋知是 siáng，敢是in鬥陣ê彼个龍哥？有ê版權資料寫「唐飛、陳文進」，彼到底是 siáng？哪會攏揣無？
阮就是行船仔討海人
討海掠魚心甘願
所有 ê 希望在漁港
環境好䆀免怨嘆
漁港……遐爾濟歌攏 teh 寫漁港，是按怎遐爾生份，我哪會 tshām 釣魚仔都毋捌？魚仔遐濟種，釣魚 ê 工具 kah 方法嘛遐濟，欲按怎分，欲按怎講，我哪會攏毋知？
是毋是像台灣受傷 ê 歷史，歌、文、戲、人、地名、信仰、冤屈、束縛、屠殺、到尾仔語言，攏無人知，無人問，佇殖民ê烏暗內底看無家己 ê 影跡，佇自由 ê 空氣內底鼻袂著土地 ê 清芳……
伊講免怨嘆……毋知敢這个意思：算 ah，無人知，遐濟物件攏無人知，連我家己都毋知，但是所有 ê 寄託、所有 ê 希望攏佇 hia，無民族就無根，無記持就無未來，是欲按怎怨嘆？
heh heh leh sioh
勇壯 ê 身體毋願輸別人
heh heh leh sioh
勇壯 ê 身體毋願輸別人
勇壯……ah！我想著 ah，唐飛敢毋是查埔變查某彼个？我會記得伊唱歌攏唱查某 ê，查某也會勇壯、也愛勇壯……毋著，thah 會當按呢想？查埔查某哪會當分別，按呢有夠落伍……但是，連討論都無人 teh 討論，欲 kah siáng 比 phīng？
是講，佇彼个年代，蹛庄跤所在，去國外拍拚，煞予頭家拐去動手術，轉來台灣閣予厝--lìn趕趕出去，毋知唐飛彼當陣是按怎度日 ê，有路無厝，閣愛面對家己無仝款 ê 身體，若我一定自殺，ah……莫怪伊講「無愛輸別人」……
抑無，幾百冬來，毋知影家己是 siáng ê 台灣人，民族起造一再破滅 ê 台灣人，是按怎生湠到這久 ê？人講台語歌 ê 精神有反殖民 ê 成份，無的確有影 m̄。
隨著波浪走西東
忍受霜風凍 毋願靠別人
透早掠魚到入暗
ah ……毋通閣怨嘆，自己該擔 ê 業著愛家己擔，講無愛輸就是無愛輸，拚甲死嘛是愛拚。
準講人攏講：「捌去過台北、台東、台南、台中，就是毋捌去過台西 leh！」，準講台西 tui 繁華漸漸衰微 ê 歷史 google lueh 就有，準講彼搭 ê 海口 hông 叫做全台灣上 sàn ê 所在，準講工業汙染幾十年來無情佇 hia thún踏，準講 in 落尾才知影，連「台西村影像館」、「南風攝影集」都毋是台西港彼个台西，是彰化大城 ê 庄頭……
決心無愛離開台西港
嘛是決心無愛離開台西港。
haih sioh — haih haih haih sioh —
台西夜港邊
海鳥仝款佇hia叫，海墘仔 hia 猶未死 ê、欲死 ê、死--去 ê，其實攏總 hām 伊無 tī-tāi，但是咱人 teh 欣賞 ê，台西港紅紅 ê 夕陽，應該會一工比一工閣較媠才著。
