這條歌是看吳國禎先生ê冊《台語流行音樂史》才知影ê，原唱郭金發，作詞劉達雄，應當是1966電塔唱片發行，啊若原曲是日本歌，吉田正作曲、橋幸夫唱ê《哀愁の果てに》。
郭金發ê原版編曲真幼路，弦樂kah gih-tah真鬥搭，配合郭金發厚閣柔ê聲音，親像一幅足媠ê畫，kah日本原曲正統ê管弦樂編曲有親像，就是掛tī美術館hông參觀ê藝術品。
但是我閣較按怎，都無法度放袂記1988年陳一郎ê版本，mā是心肝內上蓋數念ê版本：
1980年代， 台語歌曲mā開始進入tī夜市仔走唱ê時代，成本較低ê midi 編曲tsua̋nn變做主流時行ê技術，陳一郎湊拄坎tui彼ê時代tshìng起來，伊彼號倯閣阿草ê歌聲，配合midi製造出來ê粗粗粗ê編曲hām錄音，正正就是流浪ê人一生ê命運：艱苦罪過。
人客官，請你斟酌看，一郎ê版本tī YouTube 面頂，竟然寫做「流浪天涯半吉他」，連「伴」彼字都會當寫毋著，遐爾粗遐爾凊彩，袂輸天頂無疑悟拚落來ê大雨，叫艱苦人是欲按怎活？
北風冷加添阮寂寞心情
黑色的吉他掛在胸前
烏色ê天，烏焦ê心，我已經啥物攏無，tshun寒kah透骨ê北風teh鑽心肝，提醒著我ê寂寞，所有ê執著已經袂堪得寄付予人，tshun無靈魂ê gih-tah會當陪伴著我。鼓聲挵出midi編曲特別ê節奏，親像人ê跤步，敢若苦海女神龍彼句「拖著沉重的腳步／要走千里路途」，我àng-láng ê肉體竟然變kah遐爾艱苦、遐爾生份，想著正經會驚惶。
可愛的吉他啊 心愛的吉他啊
陪伴阮在身邊 流浪過生活
過去的彼段戀情 因何起變化
啊～想起來 總是阮運命
繼續聽落去，粗粗粗……一郎teh唱「總是阮運命」彼句，彼ê粗粗粗ê聲，毋才真正號做運命，據在你有啥物才調移山倒海，運命若到註定你為情流浪，你著愛放捒一切去行彼條烏暗路，親像傳說中，一郎tui修理oo-tóo-bái ê師仔，雄雄煞變做大歌星彼種複雜ê心境。我想著蔡小虎《隨風來去》內底，啉酒醉坐飛機，據在伊欲載去佗位ê畫面，最後彼句「好歹由天／阮要隨風來去」，就是痛苦ê心情催kah盡磅，不如全部捒予天、捒予運命，正正就是一種台灣人思想ê消敨。
無人影行這條黑暗街路
狗螺聲引阮心內驚惶
驚惶無助ê時陣，是毋是就愛拜神拜佛才著？但是我ê是遐爾假勇ê人，彼種驚惶就愛家己擔才著吧？若聽一郎ê歌聲，可能真歹相信伊會驚狗，但是我是無仝款，若較烏暗ê所在我就會驚，做人按呢是欲怎樣？我mā毋知影，橫直一郎唱都唱ah，神明我總會用得莫kā求，看世間敢有一屑仔自尊我會堪得攬予牢？
可愛的吉他啊 心愛的吉他啊
你跟我受風寒 同款的運命
感謝你甲我做著 忠實的伴侶
啊～到今夜 只有你甲我
哪會最後我ê運命tshun一支gih-tah？是按怎gih-tah變做唯一忠實ê伴侶，因為較早彼ê人僥心變卦，人攏會變卦，gih-tah煞顛倒無跤無通走，敢若足悲哀，但是若無是欲按怎，親像一郎tui恆春上都市，煞早早就啉酒死去，你感覺足悲哀，若無是欲按怎？總是既然註定愛執著，不如執著tī一支袂講話袂害人ê物件頂面，我kah伊流浪西東，人世間ê愛kah恨攏寄託tī伊ê身上，雖罔伊是物仔，總是有一工會生鉎會爛去，毋過至少比人較袂變卦，應該吧？
沿路來藍色的暗淡路燈
照出阮流浪茫茫前程
路燈變做藍ê，是毋是目睭已經花去？人teh講茫茫前程，放蕩ê我敢有親像？一郎ê歌聲有一寡查某teh kā合音，但是彼ê聲音原仔粗kah若眠夢，繁華鬧熱ê往事tī路燈跤攏變做一場空，我想著陳明章《黑夜的雲》內底彼句「綠色的路燈腳／阮是人人踏過的黑影」，講若閣按呢落去「將來後悔會來不及」，親像彼條烏暗前途，總是自己選擇，一工若後悔攏是家己愛承擔。
可愛的吉他啊 心愛的吉他啊
只有你瞭解阮 苦戀的心性
為著伊看破世情 抱恨走天邊
啊～期待著 何日見光明
無人會當了解一ê人ê苦情、ak-tsak、束縛kah驚惶，劉達雄先生特別用「心性」去表達，毋但痛苦ê心情，閣有後壁家己扭曲刺鑿ê個性，親像濁水溪公社《晚安台灣》，「了解社會是非／漂丿的人總是卡吃虧」，決心欲飄撇流浪走天邊，煞著愛抱著恨才行會開跤，就按呢雙跤愈行愈遠，tī罩烏雲ê心肝內煞愈行愈深，就是流浪ê人永遠註定無通好快活。
《流浪天涯伴吉他》這條歌若聽煞，尾溜仔講著「啊～期待著／何日見光明」，咱thìng-hó接落去聽郭金發ê《生命的太陽》，仝款是劉達雄先生作詞，看若彼ê人真正揣著後一ê光明，會怎樣拚命kā攬牢：
心愛的太陽 求你不倘離開我
我可比海上孤帆 行無路走入黑暗
帶著我 帶著我 平安隨南風駛入港熱情的太陽 請你緊來照著我
空虛的無聊生命 若無你袂快活
解救我 解救我 永遠來身邊安慰我生命的太陽 感謝你來溫暖我
冰冷的一粒心肝 那親像火燒山
燒死我 燒死我 生死無關係我驚寒
如今，劉達雄、郭金發、陳一郎，攏已經tī天頂做仙ah，毋知in敢會孤單，敢會閣輪迴來人間，做遐爾迷人ê台灣歌？
附上吳國禎先生ê冊《台語流行音樂史》，內底劉達雄先生ê手筆，阮會永遠會記得遮ê gâu人，予遮ê歌代代流傳落去，安慰每一ê tī心肝內流浪ê台灣人。
