布袋戲个歌內底，大部份佮真濟台語歌仝款，帶著無盡个憂愁佮怨恨，但是，布袋戲內底特殊个劇情，煞予遮个布袋戲歌加帶著一寡流浪天涯个氣口。譬論講，苦海女神龍个「流浪著千里遠／無一个相借問」、大節女个「天涯流浪受風霜／欲揣阮情郎」，攏共彼款走傱天涯無依無倚个心情，表現了真著味。
黑（烏）玫瑰這塊歌，嘛是仝款个氣口。一開始个描寫佮苦海女神龍誠成：「炎熱个金色太陽／白色个茫霧／迫阮流浪个孤女／異鄉半沉浮……」，煞落就是對一个男性个怨恨；但是，這條歌有一个真無仝款个所在，是佇咧伊上尾个部分：
「反悔阮當初來墮落／才著受痛苦
跳出黑暗的江湖／不願耽誤好前途
安份守己願吃苦／行著光明路」
我真罕得佇台語歌內底聽著這種理路，佇深深愁海當中，烏玫瑰揣出伊愛解脫个決心，論起來這毋是一件簡單就會用得寫出來个方向。愛知影，佇這个年代个台語歌，是佇五字、七字等等一定个格式內底，才閣添字入去，彼內面个情緒，也就佇這種較文言个型式內面表達出來，在我來看，這種文言个方式限制了歌詞字數个長度，煞因為按呢，致使著歌詞內底一字一句个重量變甲閣較大，每一字佇心肝內攏會當鑽了閣較深、鑿了閣較疼。所以講，佇這个歌詞短、情緒深个型式限制內面，烏玫瑰會當共歌詞个理路轉一个彎，寫到欲安份守己个光明理想遐去，我感覺是真難得个代誌。
歌詞个方向扞了好，歌手个唱路嘛真重要，這塊歌我家己佇網路頂面聽起來，感覺唱這條上出名个方瑞娥確實唱了上好，尤其伊逐擺一定會共這塊歌个哀怨表現佇身體个姿勢內面，予觀眾感受著个感情真正有夠飽滇：https://youtu.be/H4TnAg9JCZY?t=4m10s
但是但是，我一定愛用這个曾心梅佇電視節目內底唱个影片來分享，就干焦為著黃俊雄大師佇內底个口白實在講了太好咧，好甲這幾句話毋知予我傷心幾百遍去矣：
（開頭：）
淪淪碌碌走西東
蒼天降下女英雄
神奇飛出無情劍
割斷情絲難相逢
（第二、三段中央：）
炎炎的玫瑰
怎能抵受寒冷的冰霜
我要脫離冷酷無情的世界啦
認真想起來，討債了了个青春，嘛是親像這款个心情。
https://www.youtube.com/watch?v=vxpYxTcxxOU
＝＝＝＝＝＝＝＝＝＝
1973 這个數字，是我google來个（https://goo.gl/Dt64it），但是資料寫講彼陣个原唱毋是這馬逐家頭一个想著个方瑞娥，是一个號做麗娜个歌手，彼當時唱片公司拜託黃俊雄大師創一个「黑（烏）玫瑰」个角色，來配合這條歌，作詞佮作曲嘛毋是黃大師本人，等於是先有歌才有這个布袋戲个角色，彼个角色嘛干焦出現一下仔爾爾，所以到今仔日關於烏玫瑰這个角色个資料真少。
阮遮个profile picture所用个「苦海女神龍」，是佇1971年出來个歌，今仔日這塊是1973，究竟彼是啥物款个年代？自1970黃俊雄个雲州大儒俠佇電視台造成轟動了後，偌濟流傳到這馬个經典，攏佇彼个年代一條一條出世，彼个時代个人，敢會體會著彼種見證歷史个感覺？如今，恐驚無偌濟人猶會記得這塊歌是按怎出來个，阮出生个時陣嘛已經離彼个年代真久囉，只有家己佇這馬沓沓仔數念。
